A AC Taekwondo colleita seis medallas no Open de Moaña entre combate e poomsae
A AC Taekwondo tivo unha intensa fin de semana de competición no Open de Moaña, onde participou tanto na modalidade de combate como no Open rankeable de poomsae.
No primeiro, o club levou cinco deportistas e logrou catro medallas, mentres que no segundo desprazou o equipo de poomsae, que sumou dúas novas preseas.
En combate, Izan Rigueiro proclamouse campión en categoría infantil P8, demostrando unha notable melloría no seu rendemento. Pola súa parte, Pablo Ferreira e Lucas Trebolle conseguiron cadanseu bronce nas categorías infantil e cadete masculino, respectivamente, asinando boas actuacións con marxe de mellora. Tamén competiu Noel Préstamo, que nesta ocasión non puido subir ao podio, mais sumou unha experiencia valiosa para futuras citas.
O club botou en falta a presenza de Aarón González, baixa por lesión, ao que lle desexan unha pronta recuperación. En canto a Cleo, asinou unha brillante participación ao acadar o bronce despois de superar a unha rival portuguesa por KO técnico en dous asaltos e á cabeza de serie da categoría tamén por KO técnico no segundo asalto. Na semifinal perdeu por un axustado 11-12 tras un combate moi igualado que se decidiu no terceiro asalto.
No Open rankeable de poomsae, Mateo Fernández proclamouse campión na categoría júnior, mentres que Brais Lombardero obtivo a prata en cadete. Para o resto do equipo foi o primeiro torneo da tempada, e aínda que varios alumnos conseguiron chegar á final, non lograron medallas. Desde o club destacan que o salto da modalidade amateur á competitiva resultou esixente, pero serviu como importante aprendizaxe de cara ás próximas probas.
A seguinte parada para a AC Taekwondo será o Open de Croacia, que se celebrará a vindeira semana.