A AC Taekwondo xa ten en marcha a II edición do Open do Camiño Vila de Sarria
A AC Taekwondo de Sarria xa está preparando a segunda edición do Open do Camiño Vila de Sarria, que se celebrará o sábado 10 de xaneiro de 2026 no pavillón novo do Chanto. A nivel galego, este tipo de eventos adoitan reunir entre 400 e 500 deportistas, polo que superar esa cifra sería considerado un éxito rotundo, segundo destacou Alex Losada, responsable do club, que engade “creo que podemos logralo”.
A xornada comezará pola mañá coa proba clasificatoria para a selección galega infantil, que marcará o inicio do circuíto competitivo de 2026. Posteriormente, durante o resto do día celebrarase unha gran festa do taekwondo, con categorías pouco habituais tanto en Galicia como en España, incluíndo modalidades en parellas e tríos. O obxectivo é que tanto os máis pequenos como os que inician a competición poidan probar, competir e familiarizarse coas dinámicas deportivas.
Losada explicou que a fase matinal permitirá aos nenos e nenas descubrir a competición nunha contorna menos esixente, “para que a vexan como un xogo e co tempo formen parte de campeonatos máis rigorosos e preparados para competir a altos niveis”. O club aposta por unha filosofía de aprendizaxe progresiva, na que o obradoiro inicial permita gozar, aprender e despois medrar como deportistas.
As inscricións abriranse o 1 de decembro e permanecerán dispoñibles ata o 28 do mesmo mes, dando opción a todos os interesados a participar nesta cita deportiva de referencia no calendario galego de taekwondo.