A ANPA do CEIP do Páramo denuncia o adiamento das ratios e lanza unha campaña de firmas
A ANPA do CEIP do Páramo vén de iniciar unha campaña de recollida de sinaturas a través da plataforma Change.org para que se apliquen xa este curso escolar as ratios reducidas nos colexios dos concellos de menos de 3.000 habitantes.
O colectivo recorda que antes das eleccións asinouse un acordo cos sindicatos para que as novas ratios entraran en vigor de inmediato nos pequenos concellos, mais agora, sen aviso, a Xunta introduciu reformas que pospoñen a medida ata 2027/28, cando xa será outro ano electoral.
Segundo denuncian desde a ANPA, esta situación deixa aos centros rurais nunha posición complicada, obrigando a agrupamentos “absurdos” e a recortes de profesorado. No próximo curso, no CEIP do Páramo, onde estarán matriculados 44 nenos, haberá 18 alumnos xuntos en 1º, 2º e 3º de Primaria e outros 18 en 4º, 5º e 6º, cada grupo cun só profesor, mentres que o ano pasado contaban con dous docentes por cada clase mesturada. Este reparto evidencia, segundo as familias, a falta de compromiso real coa educación rural.
“Non estamos a pedir nada extraordinario, só que se cumpra o que xa se aprobou e anunciou, e que máis tarde se decidiu adiar sen ningunha explicación”, subliñan. Engaden que as normas non poden ser iguais para realidades distintas: “O rural non é unha cidade. Aquí non hai outras escolas á volta da esquina. Se se deterioran os nosos centros, as familias marcharán, e ese será o final do rural que tanto din defender”.
O problema, destacan, está no texto da lei, que establece que neste curso só se aplican as ratios máximas de 14 alumnos por aula en 1º e 2º, mais se se engade 3º, poden ser 18 nenos. “É unha contradición que non ten sentido. Temos nenos moi distintos xuntos e a solución que propón a Xunta non resolve nada”, aseguran desde a ANPA, que valora solicitar a Inspección de Educación dous profesores adicionais, aínda que recoñecen que “co DOGA na man non van poder facer nada”.
A ANPA do CEIP do Páramo fai un chamamento á mobilización: “Queremos que eliminen ese parágrafo da lei e que se apliquen de inmediato as ratios nos centros do rural. Son nenos, non números. O rural non pode agardar”.
Tamén buscan contactar con outros colexios do rural que se atopen nunha situación similar para sumar apoios á petición. As familias avisan de que se non se corrixe esta situación, algúns pais poderían plantexarse retirar aos seus fillos do colexio, algo que cualifican como un atropelo e un risco para a supervivencia das escolas rurais.
A ANPA lembra que esta é unha decisión política e que só os responsables políticos poden reverter esta inxustiza. “Se a vontade era certa antes das eleccións, demóstreno agora. Todos os nenos, vivan onde vivan, merecen un ensino público de calidade”, conclúen.