A Asociación Cultural de Láncara enche o verán de actuacións
![cine lancara](https://sarriaxa.com/wp-content/uploads/2021/07/cine-lancara.jpg)
A Asociación Cultural Val de Láncara organiza nestes meses de xullo e de agosto diferentes actividades e actuacións para poder gozar dun verán distinto, cunha oferta de ocio e de lecer dirixida a todos os públicos.
O programa coas diferentes actividades comezará no día de mañá cunha xornada de xogos tradicionais para todas as idades. Será a partir das 17 horas na área recreativa Manuel Fernández Arrojo. Para máis información ou para inscribirse pódese contactar coa organización a través dos números de teléfono 691 175 650 ou no 630 762 688.
Xa en agosto, o primeiro fin de semana, realizaranse diferentes actividades lúdicas e amenas coas que disfrutar duns días diferentes. O venres 6 de agosto a xornada adicarase á música coa actuación de Tributo a Sabina nos chamados seráns de música. O 7 de agosto, sábado, será o turno do cine de verán coa proxección de Cuñados, un filme dirixido por Toño López e protagonizado por Xosé A. Touriñán, Miguel de Lira y Fede Pére. O domingo 8 de agosto celebrarase a Festa da Malla na que aqueles e aquelas que descoñezan o proceso poderano vivir en primeira persoa.
As xornadas de ocio continuarán en Láncara o 13 de agosto cos Seráns de música protagonizados, desta vez, por Brea no vento, un proxecto poético de José Manuel Brea cargado de sentimento e de historia. O sábado 21 de agosto será o turno do humor co monólogo de Brais Doval e Oswaldo Digón. Os xa coñecidos cómicos pertencentes ao programa televisivo Malicia Noticias, chegan a Láncara para arrincar risas entre os veciños, veciñas e visitantes que participen nesta xornada.
O venres 27 de agosto voltará a música cos gaiteiros de Láncara, cos que se poderá disfrutar de música tradicional e de músicos locais que amenizarán o día. Para finalizar coas actuacións neste verán, levarase a cabo o domingo 29 de agosto o cine de verán coa proxección do filme Ons, un drama psicolóxico dirixido por Alfonso Zarauza.
![cartel actividades lancara](https://sarriaxa.com/wp-content/uploads/thumbs/2021/07/cartel-actividades-lancara-200x282.jpg)