A Asociación Cultural Huhú presenta en Sarria o novo número da revista Macheta
A Asociación Cultural Huhú de Sarria celebra este xoves, 28 de agosto, a presentación do número 9 da súa revista Macheta.
O acto terá lugar a partir das 19.30 horas na Sede, capital cultural da Feculera, e contará coa participación de todas as persoas que fixeron posible esta nova edición.
Cada páxina da revista foi deseñada por unha persoa vinculada á arte moderna ou á vida cultural sarriá, converténdose nun proxecto ilustrado e cooperativo que busca dar visibilidade á creatividade local. O evento contará tamén coa música en directo do Dj Playlisto, encargado de poñer os “temazos” da Feculera Mix.
Ademais, haberá espazo para o fanzine, unha cantina con queixo e bebidas para os asistentes, creando un ambiente festivo arredor da cultura. Desde a asociación fan un chamamento á veciñanza de Sarria e a todas as persoas interesadas na arte a sumarse a esta cita especial.