A Asociación Cultural Huhú presenta 'O Lexicón Freático' no marco da Trienal Sarria
A Asociación Cultural Huhú inaugurará o vindeiro 18 de abril na Sede a súa nova exposición O LEXICÓN FREÁTICO — Volume 1, unha mostra colectiva que reúne traballos de Bárbara da Fonte, Clo Plas, João Vasco Paiva, Salvador Cidrás e Víctor.
As obras activan o proxecto desde o corpo, o territorio, a percepción, o coidado e o oficio, en diálogo cunha publicación do mesmo título realizada mediante impresión tradicional con tipografía móbil de chumbo.
Os traballos expostos non se limitan a ilustrar o léxico, senón que o poñen radicalmente en uso. A exposición esténdese ao espazo da Sede a través de pezas que exploran diferentes rexistros —corpo, paisaxe, duración, coidado e oficio— en relación directa co proceso de impresión realizado por Víctor e rexistrado en vídeo por Toño de López.