A Asociación Cultural Huhú renderá homenaxe a Matías Moreno en Sarria
A Asociación Cultural Huhú de Sarria organiza o domingo 4 de xaneiro un evento de homenaxe a Matías Moreno, músico, fotógrafo e aventureiro, co obxectivo de poñer en valor o seu legado artístico e humano. A cita terá lugar na SEDE–Núcleo Difusor de Arte Contemporánea, nun encontro aberto á veciñanza e ás persoas próximas ao autor.
Durante a xornada proxectaranse gravacións realizadas polo propio Matías Moreno, escoitarase a súa música e poderá verse a súa obra fotográfica, exposta na parede na que se integra a exposición BISBARRA. O acto propón un percorrido polas distintas facetas creativas do homenaxeado, combinando imaxe, son e memoria compartida.
Desde a organización fan un chamamento á participación para celebrar a figura de Matías Moreno nun encontro que se adianta simbolicamente á chegada dos Reis, convertendo a xornada nun espazo de lembranza, afecto e recoñecemento colectivo.