A Asociación Cultural Peleriños programa novas aulas con actividades para este curso
Desde a Asociación Cultural Peleriños informan das novas aulas para adultos e para os máis pequenos ás que as persoas interesadas xa se poden apuntar para este curso 2024-2025.
Desta forma, desde a asociación ofértanse diferentes actividades relacionadas coa música en diferentes días da semana e horarios a partir de mediados de outubro.
“Este ano dobramos os horarios en varias aulas, tanto infantís como de adultos, debido á gran demanda que temos”, explican.
Así, as aulas para adultos serán os martes, con clases de canto e pandeireta ás 18.30 horas e ás 19.30 horas con baile; os mércores, con costura ‘trad’; os venres, con baile ás 20.00 horas; e os sábados, con gaita e percusión ás 18.30 horas.
Pola súa parte, as aulas infantís serán os venres con dúas actividades: ás 17.00 horas terá lugar gaita e percusión e ás 19.00 horas terá lugar a actividade de baile.