A Asociación Peleriños presenta a súa programación de actividades ata maio
A Asociación Peleriños anunciou as próximas actividades culturais que organizará ata o mes de maio, cunha oferta diversa que busca poñer en valor as tradicións galegas.
O primeiro dos eventos terá lugar este domingo, 23 de febreiro, cun faladoiro sobre o traxe tradicional impartido por Ana Nogareda. Esta charla achegará aos asistentes á historia e simbolismo do vestiario tradicional galego.
A programación continuará o 29 de marzo coa IX edición da Estremonía Cantada, os populares cantos de taberna que encherán de música os bares de Sarria nunha xornada de festa e tradición.
Os máis pequenos tamén terán o seu espazo nesta programación cultural. O sábado 12 de abril celebrarase a III edición dos Cantos Pequenos, unha iniciativa pensada para achegar a música tradicional á infancia e fomentar a súa participación.
Para pechar esta intensa programación, o sábado 9 de maio terá lugar un acto conmemorativo das Letras Galegas, que este ano estará dedicado ás cantareiras, mulleres que tiveron un papel fundamental na transmisión da música tradicional galega.
Con esta serie de eventos, a Asociación Peleriños reafirma o seu compromiso coa promoción e preservación da cultura galega, convidando a toda a comunidade a participar nestas celebracións.