A Aula CeMIT de Sarria lanza novos cursos gratuitos para mellorar as competencias dixitais
A Aula CeMIT de Sarria vén de abrir o prazo de inscrición para tres novas accións formativas gratuítas destinadas a persoas de todos os niveis que desexen mellorar as súas competencias dixitais. A proposta combina contidos de iniciación coa aprendizaxe de habilidades prácticas adaptadas ás necesidades actuais.
Un dos cursos ofertados é Seguridade TIC Básica, de 9 horas de duración, que permitirá ao alumnado aprender a identificar riscos, protexer a súa información persoal e navegar pola rede con maior tranquilidade. Tamén se impartirá Internet, ocio e operacións dixitais, outro programa de 9 horas no que se abordarán diferentes usos da rede para comunicarse, informarse, realizar xestións ou acceder a contidos de entretemento de maneira segura.
A programación complétase con Inicio á impresión 3D, unha formación máis breve, de 3 horas, que ofrecerá unha primeira aproximación práctica ao funcionamento desta tecnoloxía, coñecendo materiais, nocións básicas de deseño e a posta en marcha dun modelo real.
As prazas son limitadas e as sesións impartiranse na Aula CeMIT do Concello de Sarria. A información detallada e as inscricións poden realizarse a través da web oficial da Aula CeMIT.