A Banda de Música da Comarca de Sarria ofrece un concerto polo Día Internacional da Muller
A Banda de Música da Comarca de Sarria (BMCS) organiza o vindeiro domingo 9 de marzo un Concerto polo Día Internacional da Muller, un evento especial dedicado a homenaxear o papel das mulleres na música.
O recital terá lugar na Casa da Cultura de Sarria, comezará ás 13.00 horas e terá unha duración aproximada dunha hora.
O programa do concerto incluirá unha selección de pezas que destacan a presenza feminina no ámbito musical desde diversas perspectivas. En primeiro lugar, interpretaranse obras compostas por mulleres, como La puerta grande, de Elvira Checa, e Femme Força, de Mercedes Femenia. Estas pezas poñen en valor o traballo e a creatividade das compositoras dentro do panorama musical.
Ademais, soarán obras dedicadas a mulleres, entre as que destacan Pepita Greus, de Pascual Pérez Choví, e Amparito Roca, de Jaime Texidor. Esta última composición adquire unha relevancia especial ao celebrarse este ano o centenario da súa creación. O nome da peza fai referencia a Amparito Roca, unha alumna do compositor á que lle dedicou a obra.
Por último, dentro do repertorio inclúense tamén pezas nas que as músicas da Banda terán un papel destacado. Un exemplo disto é O oboe de Gabriel, do recoñecido compositor Ennio Morricone, onde o solo de oboe terá un protagonismo especial, resaltando o talento das intérpretes femininas da BMCS.
Con esta iniciativa, a BMCS pretende dar visibilidade á contribución das mulleres na música e resaltar o seu talento a través dun programa variado e simbólico.