A Banda de Música de Sarria organiza unhas xornadas especiais dedicadas á trompeta
A Banda de Música de Sarria organiza os días 14 e 15 de febreiro unhas xornadas especiais dedicadas á trompeta, contando coa participación do recoñecido trompetista Juan Lois Diéguez.
Durante dous días, os membros da Banda de Música de Sarria e os alumnos da escola municipal de música poderán gozar dunha ampla programación de actividades formativas e musicais.
As xornadas arrancarán o venres 14 de febreiro na Casa da Cultura de Sarria, con clases individuais de trompeta, ensaios coa Brass Band e un ensaio conxunto da Banda de Música de Sarria xunto a Juan Lois Diéguez.
O sábado 15 de febreiro continuará a formación con máis clases individuais e unha charla sobre repertorio a cargo do propio Diéguez. Ademais, haberá exposicións de trompetas e fliscornos da marca Adams e unha nova sesión da Brass Band.
O punto culminante chegará ás 20.00 horas do sábado 15 de febreiro, cando a Banda de Música de Sarria ofrecerá un concerto na Igrexa de Nosa Señora do Rosario, co trompetista Juan Lois Diéguez como solista.
Diéguez, ademais de ser un destacado trompetista, é tamén compositor de obras recoñecidas en toda Galicia, director de banda e profesor na Banda Municipal de Santiago de Compostela.
Este evento promete ser unha cita imprescindible para os amantes da música, especialmente para os afeccionados á trompeta, que terán a oportunidade de aprender dun dos grandes referentes do instrumento en Galicia.