A Biblioteca Camilo Gonsar inicia o ano cos Simposios Salvaxes este mércores
A Biblioteca Camilo Gonsar acollerá este mércores 28 ás 20:00 horas a primeira sesión dos Simposios Salvaxes deste novo ano, un ciclo de encontros culturais no que creadoras e creadores da vila comparten co público o seu proceso creativo e as súas experiencias artísticas.
A iniciativa busca achegar diferentes disciplinas ás veciñas e veciños a través dun formato próximo e participativo, no que o diálogo e a reflexión teñen un papel central.
Nesta primeira cita participarán a bailarina Beatriz Chaos, integrante da Asociación Cultural Pelerinhos e de Huhu Asociación, o xornalista e guionista Manolo López Poy, e o escritor, profesor e avogado Félix López, coñecido como “Arlindo”, que foi ademais cronista de Sarria.
Os tres convidados ofrecerán a súa visión persoal sobre a creación artística desde ámbitos distintos, combinando danza, comunicación e literatura.