A Biblioteca da Pobra de San Xiao acollerá a actividade 'Robótica Creativa: Autos Tolos'
A Biblioteca Municipal da Pobra de San Xiao, en Láncara, converterase no epicentro da ciencia e a creatividade o vindeiro 29 de maio ás 16:00 horas coa celebración da actividade 'Robótica Creativa: Autos Tolos'.
Esta proposta vai dirixida a nenos e nenas de entre 6 e 14 anos que queiran mergullarse no mundo da tecnoloxía de forma lúdica e participativa. As prazas son limitadas e as inscricións estarán abertas ata o 26 de maio no teléfono 982 543 066.
A iniciativa, promovida pola Rede de Bibliotecas de Galicia e o Concello de Láncara, ofrece aos participantes a posibilidade de construír vehículos eléctricos autónomos, que serán logo postos a proba nunha carreira chea de emoción e tolemia.
Durante a sesión, os nenos e nenas non só desenvolverán habilidades técnicas relacionadas coa robótica, senón tamén a súa imaxinación e capacidade para traballar en equipo, ao participar nun concurso de deseño e creatividade coas súas propias creacións.