A Biblioteca Pública Camilo Gonsar recibe o Premio María Moliner polo proxecto “Tecendo redes locais”
A Biblioteca Pública Municipal Camilo Gonsar foi distinguida este ano co Premio María Moliner de animación á lectura, concedido polo Ministerio de Cultura, grazas ao proxecto “A B.P.M. Camilo Gonsar: tecendo redes locais”.
O galardón inclúe unha achega económica de 2.777,77 euros, que se destinará á adquisición de novos libros, permitindo seguir ampliando e fortalecendo o fondo bibliográfico. Este apoio facilitará a mellora da oferta de lectura para públicos de todas as idades, con especial atención a seccións moi demandadas como a comicteca e a área infantil, ademais da incorporación de novidades editoriais actuais.
Desde o Concello puxéronse en valor o traballo, a dedicación e a implicación do persoal municipal da Área de Cultura, cuxo esforzo sostido fai posible unha programación dinámica, útil e próxima á cidadanía. O premio supón así un recoñecemento colectivo a unha forma de concibir a biblioteca como un espazo aberto, de encontro e de construción comunitaria.
O proxecto premiado, “Tecendo redes locais”, afonda nun modelo de biblioteca conectada co seu entorno inmediato, que colabora con centros educativos, asociacións e entidades locais para fomentar os hábitos lectores, promover actividades culturais e desenvolver accións participativas dirixidas a públicos diversos.
O Concello anima á veciñanza a seguir facendo da biblioteca un referente cultural, participando nas súas iniciativas e achegando novas propostas para continuar medrando arredor dos libros e da cultura.