A campaña 'Non camiñas soa' da Subdelegación do Goberno chega a Sarria
A subdelegada do Goberno en Lugo, Isabel Rodríguez, presentou esta mañá en Sarria unha nova edición da campaña 'Non camiñas soa', que busca promover un Camiño de Santiago libre de violencias machistas.
A proposta, que se desenvolve un ano máis, inclúe a distribución de material informativo e recursos en 40 puntos desta localidade lucense, situada nun dos tramos máis transitados do Camiño Francés.
No acto tamén participaron o alcalde, Claudio Garrido; a xefa da Unidade contra a Violencia sobre a Muller da Subdelegación, María Luisa Castro; membros das forzas e corpos de seguridade e representantes municipais.
A iniciativa, promovida polas unidades contra a violencia machista das comunidades autónomas polas que discorre a ruta xacobea, ten como obxectivo reforzar a protección das mulleres peregrinas, tanto se realizan o percorrido soas como acompañadas, garantindo a súa seguridade e liberdade durante toda a viaxe.
As tarxetas inclúen números de emerxencia e datos de contacto das Forzas e Corpos de Seguridade, así como información sobre a aplicación AlertCops, que permite enviar alertas en tempo real coa localización exacta. Ademais, un código QR enlaza cunha páxina oficial da Delegación do Goberno para a Violencia de Xénero, dependente do Ministerio de Igualdade, onde se recollen recursos de atención e asistencia.
Rodríguez destacou que, no ano 2024, as mulleres representaron xa a maioría das persoas que completaron o Camiño de Santiago, cun 53 % do total, o que equivale a 254.677 peregrinas, fronte a 210.423 homes. “Esta realidade reforza a necesidade de iniciativas como esta, que buscan garantir a seguridade e liberdade das peregrinas ao longo do percorrido”, subliñou.
A subdelegada quixo agradecer a colaboración das forzas e corpos de seguridade, do persoal sanitario, das farmacias e dos responsables de albergues, “xa que son puntos de referencia para quen fai o Camiño, ofrecendo proximidade, confianza e unha ampla capacidade de difundir a mensaxe de prevención e apoio ás mulleres”.
Na provincia de Lugo, a campaña estenderase este ano a 377 puntos das rutas xacobeas, onde se colocarán 377 carteis e se repartirán 7.540 tarxetas en español e inglés. En Sarria, o material estará dispoñible no posto da Garda Civil, na sede da Policía Local, en cinco farmacias, 29 albergues, dúas oficinas de turismo e no centro de saúde.