A Casa da Cultura acolle, a partir das 16.00 horas, as XVII Xornadas Xurídicas de Sarria ‘Román García Varela’
As XVII Xornadas Xurídicas de Sarria ‘Román García Varela’, organizadas polo Concello e que forman parte do programa de Formación Continua do Consello Xeral do Poder Xudicial (CXPX), inauguraranse esta tarde, ás 16.00 horas na Casa da Cultura da localidade.
No acto intervirán o alcalde de Sarria, Claudio Garrido; a directora da UNED de Lugo, Ana Traseira; o responsable de Promoción Económica e Social da Deputación de Lugo, Pablo Rivera; o conselleiro de Xustiza, Diego Calvo; e o presidente do TSXG, José María Gómez y Díaz-Castroverde.
O fiscal xeral do Estado, Álvaro García Ortiz, impartirá o relatorio inaugural do encontro, que se desenvolverá ata o 14 de xuño e no que se analizará a ciberseguridade e os delitos informáticos.
O expresidente do CXPX p.s. Rafael Mozo exercerá mañá de moderador da primeira mesa redonda das xornadas, na que Juan Antonio Xiol Ríos, exvicepresidente do Tribunal Constitucional, tratará os riscos e ameazas da ciberseguridade desde a perspectiva dun xurista; Marc Robinson, maxistrado de ligazón de Reino Unido en España, abordará os desafíos de manter a lexislación actualizada; e Ana María Gude Fernández, decana da Facultade de Dereito da Universidade de Santiago de Compostela, exporá se a Intelixencia Artificial constitúe unha ameaza para os dereitos fundamentais.
As xornadas, ás que asisten xuíces e xuízas de diferentes comunidades autónomas, están dirixidas polo letrado da Administración de Xustiza Román García-Varela Iglesias e polo catedrático de Dereito Mercantil Carlos Lema Devesa.