A Casa da Cultura albergará as XVII Xornadas Xurídicas de Sarria ‘Román García Varela’
As XVII Xornadas Xurídicas de Sarria ‘Román García Varela’, que se celebrarán na Casa da Cultura da localidade os días 12, 13 e 14 de xuño analizarán este ano a ciberseguridade e os delitos informáticos.
Na inauguración do encontro, que está organizado polo Concello de Sarria e que forma parte do programa de Formación Continua do Consello Xeral do Poder Xudicial (CXPX), intervirán o presidente do Tribunal Superior de Xustiza de Galicia (TSXG), José María Gómez y Díaz-Castroverde; o alcalde de Sarria, Claudio Garrido; o conselleiro de Xustiza, Diego Calvo; o deputado da área de Promoción Económica e Social da Deputación de Lugo, Pablo Rivera Capón; e a directora da UNED de Lugo, Ana Traseira. O fiscal xeral do Estado, Álvaro García Ortiz, impartirá a conferencia inaugural.
Ao longo dos tres días, expertos participarán en mesas redondas nas que profundarán, entre outras cuestións, nos riscos e ameazas da ciberseguridade desde unha perspectiva xurídica; os desafíos de manter unha lexislación actualizada; a intelixencia artificial como posible ameaza aos dereitos fundamentais; os delitos de terrorismo no ciberespazo; as novas tipoloxías delituosas e a súa influencia na violencia de xénero; ou a privacidade no mundo dixital.
As xornadas, dirixidas polo letrado da Administración de Xustiza Román García-Varela Iglesias e polo catedrático de Dereito Mercantil Carlos Lema Devesa, contarán coa presenza de prestixiosos relatores, entre eles maxistrados do Tribunal Supremo; o expresidente do CXPX p.s. Rafael Mozo; a expresidenta do Tribunal Constitucional, María Emilia Casas Baamonde; a directora da Axencia Española de Protección de Datos, Mar España Martí; ou o maxistrado de ligazón de Reino Unido en España, Marc Robinson.
Ademais dos asistentes presenciais, entre eles xuíces e xuízas de diferentes localidades de España, as xornadas seguiranas de forma telemática desde outras comunidades autónomas e países estranxeiros a través do centro de Lugo da Universidade Nacional de Educación a Distancia (UNED).
As Xornadas Xurídicas de Sarria ‘Román García Varela’ tiveron a súa orixe en 2007 e, tras o falecemento do seu fundador, en 2013, continúan celebrándose anualmente en memoria do maxistrado.
Esta XVII edición comezará o vindeiro mércores, 12 de xuño, ás 16.00 horas. O presidente do Tribunal Constitucional, Cándido Conde Pumpido, clausurará o encontro o venres 14 de xuño ás 12.15 horas. No acto tamén participarán José María Gómez y Díaz-Castroverde, presidente do TSXG, e os codirectores das xornadas, Román García-Varela Iglesias e Carlos Lema Devesa.