A Casa da Cultura de Sarria acolle desde o venres a II Mostra Iván Tourón Morais
A Casa da Cultura de Sarria acollerá desde este venres ata o día 15 de outubro un total de dez espectáculos teatrais -cinco para público infantil e cinco para público adulto- dentro da programación da II Mostra de Teatro Iván Tourón Morais.
Este ciclo, impulsado pola Concellaría de Acción Cultural de Sarria e a compañía Rebuldeira Teatro, conta coa colaboración da Xunta de Galicia, a través da Rede de Bibliotecas Públicas “Ler conta moito”, e da Vicepresidencia da Deputación de Lugo.
A programación infantil arrancará este venres ás 17.30 horas coa obra “Cambi@ contos: Flipa cos contos”, a cargo de Bandullo Azul e Fran Campos. O día 22 de setembro, tamén ás 17.30 horas, será Felipe Díaz Valle quen ofrecerá o espectáculo “Miña casa. Meu lar (contos ambientais)” e o día 29 chegará o turno de Cris de Caldas coa obra “A bibliotecaria estrafalaria 2.0”, tamén á mesma hora. As dúas últimas funcións do ciclo infantil serán o 6 de outubro ás 17.030 horas, con Charo Pita representando “A cabeza a paxaros”, e o día 13 de outubro, tamén ás 17.30 horas, con Marta Ortiz e a obra “Tralará. Contos, obxectos e música”.
En canto á programación teatral para o público adulto, o domingo 17 de setembro ás 20.00 horas a Casa da Cultura acollerá a obra “Cita previa”, da Compañía Rebuldeira Teatro. O domingo 24 de setembro, tamén ás 20.00 horas, será a compañía Teatro do Miolo a que represente a obra “Saíndo do cerco”, mentres que o día 1 de outubro a compañía Bátega Teatro ofrecerá a obra “O mundo de Martina” ás 20.00 horas. As dúas últimas funcións serán o 8 de outubro (20.00 horas) coa obra “Asasinato na tenda de roupa”, a cargo do Grupo de Teatro do Hospital de Lugo, e o día 15 de outubro (20.00 horas), con “Vaia lío”, a cargo da compañía Charamela.
Sorteo de agasallos para incentivar a participación
Coa finalidade de incentivar a asistencia ás diferentes funcións, o concelleiro de Acción Cultural, César No, anunciou que distribuiranse entre os asistentes tarxetas de fidelización para que aquelas persoas que acudan polo menos a catro das funcións programadas tanto no ciclo adulto como no infantil poidan entrar no sorteo dun lote de libros ou de tres meses de suscrición gratuíta ao Centro Deportivo e Saúde Sarria.
