A charanga Bicoia abre o cartel do Festival Terra Brava 2026 do Incio
O Festival Terra Brava do Incio comeza a quentar motores para a súa edición de 2026, que terá lugar o 15 de agosto, coa primeira confirmación do seu cartel. A organización anunciou a incorporación da Charanga Bicoia, unha formación feminina que destaca pola súa enerxía e pola capacidade de converter cada actuación nunha auténtica festa.
A banda, integrada por mulleres e cun repertorio pensado para facer vibrar ao público, será unha das encargadas de poñer ritmo a unha xornada que cada verán reúne no Incio a centos de persoas arredor da música e do ambiente festivo. Coa súa presenza, o festival aposta por unha proposta fresca e potente, capaz de facer bailar sen pausa e de encher o recinto de sonoridades festivas.
A confirmación de Bicoia supón o primeiro adianto dun cartel que se irá completando nos vindeiros meses e que, como en edicións anteriores, buscará combinar diferentes estilos e sensibilidades musicais. O Terra Brava consolídase así como unha das citas culturais do verán na comarca, cunha programación que pretende atraer tanto ao público local como a visitantes doutros puntos de Galicia.