A Deputación entrega as obras do polígono industrial ao Concello de Paradela
O presidente da Deputación de Lugo, José Tomé Roca, entregou este venres ao Concello de Paradela as obras realizadas no polígono industrial nas que investiu 1 millón de euros. Unha actuación que incluíu obras de urbanización, e a creación de áreas verdes, de solo dotacional, de viarios, de beirarrúas e aparcamentos.
José Tomé asinou coa Alcaldesa de Paradela, Montserrat Mulet, a acta de recepción das obras da infraestrutura. O acto tivo lugar na parroquia de Santa María de Vilaragunte, no lugar do Gandarón, punto onde está situado o propio parque empresarial participaron tamén os Deputados de Promoción Económica e Social, Pablo Rivera, de Formación, Ensino e Economía do Coñecemento, Miguel Fernández, e o de Participación Cidadá, Iván Castro.
Durante o acto, o Presidente sinalou que esta entrega supón “un gran avance para o desenvolvemento económico e industrial de Paradela e do conxunto da provincia”. Ademais, destacou que este novo servizo que a institución provincial pon á disposición do empresariado “servirá de aliciente para asentar e impulsar novos proxectos empresariais e a atracción de investimentos que promovan novo emprego e o crecemento económico”.
O novo polígono, cunha superficie total de 32.280 m², “proporciona un espazo atractivo e cómodo para as novas empresas”, engadiu José Tomé. Ademais, destacou que inclúe áreas verdes, viarios, beirarrúas e aparcamentos, o que mellorará significativamente a infraestrutura e a calidade de vida na zona.
“Hoxe é, sen dúbida, un día importante para todos, xa que esta nova infraestrutura contribúe de maneira significativa ao fomento do desenvolvemento empresarial e comercial, esencial para o benestar local e para o progreso da provincia,” afirmou o Presidente.
17 parcelas dispoñibles e 2 vendidas
O mandatario provincial anunciou que varios empresarios xa amosaron interese en establecerse no polígono industrial de Paradela, para o que deben formalizar a súa solicitude de compra ante a Deputación Provincial. O recinto dispón de 19 parcelas, das cales só 17 están dispoñibles actualmente, xa que dúas xa foron vendidas. As parcelas teñen superficies que oscilan entre os 700 m² e os 2.000 m², cun prezo de 27,20 €/m². Estas parcelas foron postas á venda mediante poxa, un procedemento aprobado pola Xunta de Goberno da Deputación Provincial en sesión ordinaria o 14 de xaneiro de 2022, e anunciado na Plataforma de Contratación do Sector Público.
O parque empresarial, situado na parroquia de Santa María de Vilaragunte, ocupa unha superficie total de 32.280 m². Deles, 21.569 m² corresponden a parcelas de solo urbano que serán postas á venda pola Deputación de Lugo, mentres que o solo dotacional abarca 728 m². Os viarios, beirarrúas e aparcadoiros suman 6.155 m², e as áreas verdes ocupan 3.828 m².
Coa incorporación deste polígono industrial en Paradela, a Deputación de Lugo xestiona actualmente a venda de parcelas en nove parques empresariais situados nos concellos de Baleira, Castroverde, Chantada, Friol, Ourol, Begonte e Cospeito.