A exposición BIS/BARRA abre esta fin de semana con novos horarios en A Sede de Sarria
A Asociación Cultural Huhú deu a coñecer os horarios de visita da exposición BIS/BARRA — Na parede está todo para esta fin de semana en A Sede – NDAC, en Sarria. O espazo poderá visitarse o venres 28 de 17:00 a 20:00, o sábado 29 de 12:00 a 14:00 e de 17:00 a 20:00, e o domingo 30 de 12:00 a 14:00.
A mostra preséntase cunha instalación na que todas as obras aparecen colgadas á altura dos ollos e dispostas nunha mesma liña, un xesto deliberado que pretende situar todas as voces ao mesmo nivel.
Desde Huhú destacaron que esta relación visual entre a parede e o chan funciona como metáfora do sostén da exposición: o que se amosa e quen acode a observalo. A asociación subliñou tamén que o feito de que a metade das pezas proceda de mulleres desmonta a idea de que o rural fala cunha única voz.
Concibida como unha radiografía do Sarria que persiste cando ninguén observa, a exposición compila memoria familiar, escola, afección e continuidade. Moitas das creacións chegaron acompañadas de emoción e inseguridade, un sentimento que, segundo a entidade cultural, tamén conforma a identidade da comunidade.