A Feira de Produtos e Artesanía de Samos volverá o 10 de agosto con Antonio Rigueiro como pregoeiro
A vila de Samos prepárase para acoller unha nova edición da súa Feira de Produtos e Artesanía, que se celebrará o vindeiro sábado 10 de agosto. A cita, organizada pola Asociación de Comerciantes e Artesáns de Samos, volverá a converter o municipio nun escaparate de creacións locais, tradicións e sabores da terra, nunha xornada que combina identidade cultural e dinamización económica.
A organización xa confirmou quen será o encargado de dar o pregón: Antonio Rigueiro Rodríguez, catedrático emérito da Universidade de Santiago de Compostela e actual presidente da Asociación Forestal de Galicia. A elección responde tanto á súa ampla traxectoria profesional no ámbito da investigación ambiental como á súa vinculación afectiva coa zona, xa que Rigueiro é natural do concello veciño de O Incio e conta con vínculos familiares directos en Samos.
Desde a asociación organizadora explican que a súa figura representa “o compromiso coa sustentabilidade, o coñecemento do rural e o apego pola nosa contorna”. Nas vindeiras semanas, presentarán o programa completo da feira, que contará con postos de venda, actividades culturais e animación para todas as idades.