A ludoteca de Nadal de Sarria abrirá o prazo de inscrición este luns, 1 de decembro
A Concellería de Igualdade do Concello de Sarria pon en marcha para este Nadal a Ludoteca do Programa Sarria Concilia, unha proposta que se desenvolverá do 22 de decembro ao 7 de xaneiro, ambas datas incluídas, co obxectivo de crear un espazo de lecer dirixido ás crianzas das familias traballadoras durante o período vacacional. A iniciativa está destinada ao alumnado de Educación Infantil e de Educación Primaria dos centros educativos do municipio.
O servizo nace para favorecer a conciliación da vida laboral e familiar ao tempo que se impulsa o desenvolvemento integral das e dos menores participantes mediante unha programación que combina xogos, propostas creativas, actividades culturais e dinámicas centradas no coñecemento do entorno.
A oferta inclúe un total de 75 prazas e establécese un mínimo de 15 participantes para activar a ludoteca. O funcionamento estrutúrase en tres modalidades horarias: o servizo de madrugadores, de 07:30h a 09:30h; a Ludoteca de Nadal, de 09:30h a 14:00h; e o servizo de friameira, garda e custodia, de 14:00h a 15:30h.
O prazo para presentar solicitudes permanecerá aberto do 1 ao 9 de decembro.