A nova ponte de Supena, a piques de estrearse tras un investimento de 600.000 euros
As obras da nova ponte de Supena atópanse xa na súa última fase, co formigonado do taboleiro como último paso para inaugurar a construción, que contou cun investimento superior aos 600.000 euros.
Segundo os prazos, a ponte situada na parroquia de Ronfe de Láncara, a infraestrutura estará operativa nun mes, despois de ser demolida e construída de novo, xa que a antiga ponte sufría graves danos nun dos seus piares, deterioro que se agravou polas crecidas do río Sarria en xaneiro de 2023.
Por mor deste deterioro, o Concello decidiuse a pechala ao tráfico e optouse por levantar unha nova estrutura no mesmo emprazamento para manter a integración coa rede viaria, despois de que o alcalde de Láncara e o presidente da Confederación, José Antonio Quiroga, asinaran en febreiro de 2023 un protocolo de actuación e, un mes despois, un convenio de colaboración.
Segundo este acordo, a CHMS financia o 80 % do orzamento, mentres que o Concello achega o restante, mediante unha modificación de crédito.
A NOVA PONTE
A novo viaduto conta con dous carrís de tres metros cada un, ademais dun espazo para peóns de dous metros de ancho, xa que a vella ponte contaba cun único carril de tres metros de ancho, insuficiente para permitir o cruce simultáneo de dous vehículos, segundo indicou a CHMS.
Así, as obras requiriron o desvío provisional da rede de abastecemento, afectada pola construción dun estribo na marxe dereita do río; así como foi necesaria a reposición dun camiño de acceso desde os terreos situados na marxe esquerda, así como a restauración ambiental do río Sarria e as súa contornas.
Este viaduto conectará Ronfe e Pousadela, facilitando a mobilidade e servindo de unión para numerosas leiras agrícolas, ademais de beneficiar a máis de 200 veciños destes dous núcleos de Láncara.