A primeira edición do curso de primeiros auxilios pediátricos en Sarria foi todo un éxito
O curso de primeiros auxilios pediátricos celebrado nas instalacións do Servizo de Atención Temperá (SAT) de Sarria concluíu cun balance moi positivo e unha acollida excelente por parte da veciñanza.
A actividade, promovida polo equipo profesional do SAT en colaboración co Concello de Sarria, completou todas as prazas dispoñibles e mesmo deixou familias en lista de espera, o que puxo de manifesto o interese e a necesidade deste tipo de formacións na comarca.
Debido á alta demanda, xa está convocada unha segunda edición que terá lugar o vindeiro xoves 31 de xullo ás 9:30 horas. Neste momento só quedan dúas prazas dispoñibles, polo que as persoas interesadas deberán inscribirse canto antes chamando ao teléfono do SAT: 621 371 524.
Ademais, desde a organización están a valorar a posibilidade de programar novas xornadas formativas centradas no apoio á crianza, co obxectivo de seguir ofrecendo recursos útiles ás familias da zona.
O Concello e o equipo do SAT agradeceron a participación das familias, así como a implicación das matronas e nais colaboradoras, fundamentais para o desenvolvemento e éxito desta iniciativa.