A recollida de plásticos agrícolas de silos comezará o 15 de maio en Samos
O Concello de Samos, encabezado pola alcaldesa María Jesús López López, anunciou a posta en marcha dun novo servizo de recollida de plásticos agrícolas procedentes de silos, que comezará a partir do 15 de maio de 2026.
A medida está dirixida a agricultores e gandeiros do municipio, aos que se lles solicita que depositen este tipo de residuos nos puntos de recollida habilitados uns días antes da data prevista para facilitar a súa retirada.
Desde o goberno local lembran a importancia de respectar as normas establecidas para garantir o correcto funcionamento do servizo. Así, insisten en que unicamente se poderán depositar plásticos de silos, quedando expresamente prohibido deixar outros materiais como cordóns, mallas, tubos de film ou calquera outro tipo de residuo.
O bando municipal subliña que esta iniciativa busca mellorar a xestión dos residuos agrícolas no concello e contribuír a un tratamento máis adecuado deste tipo de materiais, favorecendo tamén o coidado do medio ambiente.