A sarriá Ana López Gallego pecha unha tempada brillante na Copa Galicia de tiro deportivo
A deportista Ana López Gallego, integrante do club de tiro San Juan de Sarria, volveu despedir o ano subíndose ao podio tras acadar a terceira posición na Copa Galicia de tiro deportivo. A tiradora chegou á final liderando a clasificación, aínda que finalmente rematou nun destacado terceiro posto, nunha competición de alto nivel na que foi, ademais, unha das poucas mulleres participantes.
O resultado confirma o excelente momento deportivo de Ana López, que asinou unha actuación sólida e competitiva, sumando un novo mérito a unha tempada especialmente frutífera. A súa regularidade e capacidade para manterse entre as mellores fixérona destacar ao longo de toda a proba, pechando o ano cun balance moi positivo.
Este novo éxito chega poucas semanas despois de proclamarse subcampioa de España na categoría de dama en pistola de aire comprimido a dez metros, un logro que xa a situara entre as referentes do tiro deportivo feminino a nivel estatal. Ademais, ao longo da tempada tamén conseguiu a medalla de ouro na Copa de España da mesma modalidade, consolidando unha traxectoria ascendente.
Con tan só 22 anos, Ana López Gallego continúa demostrando talento, constancia e unha notable proxección deportiva, levando o nome do club San Juan de Sarria aos primeiros postos das competicións autonómicas e nacionais e confirmándose como unha das promesas máis firmes do tiro deportivo galego.