A SD Sarriana prepárase para unha nova etapa ilusionante na 2ª RFEF con Iván Carril ao mando e reforzos clave
A SD Sarriana inicia a tempada 2025-2026 cun proxecto cargado de ilusión e desafíos tras conseguir o ascenso á Segunda Federación o pasado mes de xuño.
O club afronta este novo capítulo baixo a dirección do novo adestrador, Iván Carril, que asume o mando do equipo Senior A coa misión de consolidar a Sarriana nesta categoría.
Iván Carril chega con ampla experiencia, un compromiso firme e unha gran paixón polo fútbol, cualidades que o club considera fundamentais para enfrontar os retos da 2ª RFEF. O seu liderado busca potenciar a ambición e o traballo en equipo que teñen caracterizado a entidade nos seus éxitos recentes.
O cadro de xogadores para esta tempada xa está perfilada e conta coa renovación de varios xogadores fundamentais. Entre eles destacan Jacobo Vilariño, Arona Sané, o máximo goleador do curso pasado Álex Millán, Javi Piay, Álex Boedo, o porteiro César Pirot, Santi Gegunde, Maxi Levrand, Tomás Susavila e Valentín Mosqueira, que seguirán achegando o seu talento e experiencia ao conxunto.
Ademais, a SD Sarriana incorporou importantes reforzos para fortalecer a plantilla. Entre as fichaxes máis destacados están Antón Núñez, Iago Díaz, Iago Parga, Nacho Olivera, Edu González e Ivaldine Da Silva 'Ju', xogadores que achegarán calidade e versatilidade para afrontar a esixente competición que supón a Segunda Federación.
Como é habitual nestes procesos, a chegada de novos futbolistas implica tamén a despedida dalgúns xogadores. O club quixo agradecer publicamente a Brais, Keko, Javi Liz, Diego Rey e Azael o esforzo e a dedicación que demostraron durante a súa etapa en Sarria, desexándolles moita sorte nos seus futuros proxectos deportivos.
Con este conxunto renovado e unha dirección técnica comprometida, a SD Sarriana afronta unha tempada chea de expectativas, coa firme intención de consolidarse e medrar nunha categoría esixente que abre novas oportunidades para o club e a súa afección.