A serie documental 'Galicia diversa' estréase esta tarde na Casa da Cultura de Sarria
A Casa da Cultura de Sarria acolle a estrea pública da serie documental Galicia diversa, da plataforma Agalega.gal da TVG a partir das 18.00 horas.
O proxecto, no que colabora Diversa Infantil, a Plataforma da Diversidade Funcional Infantil da Comarca de Sarria, contou coa participación de varias familias da localidade.
No acto, intervirán o director da serie, Damián Varela, e o sarriao Manuel Darriba, director e guionista do proxecto. Ademais, tamén tomarán a palabra algúns dos protagonistas do programa, que comparten as súas experiencias persoais sobre a discapacidade e a diversidade funcional.
Desde Diversa Infantil, organizadora do evento, fan un chamamento á cidadanía para asistir á presentación deste proxecto tan especial, que ofrece unha ollada sen prexuízos á discapacidade e á diversidade funcional, permitindo sensibilizar e concienciar á sociedade sobre a importancia de incluír e respectar as diferenzas.