Deportes

Con respecto ao Xuvenil, tamén está competindo por ascender a Preferente Futgal despois de quedar entre os catro primeiros

Todos os equipos da Sociedade Sarriana están tendo unha boa tempada, tal e como defenden desde o club, que destacan a mellora en cada un dos grupos deportivos que conforman a entidade.

Así, valoran positivamente o posto clasificatorio do primeiro equipo, o sénior A, que se atopa de terceiro na táboa da súa categoría, a 3ª RFEF. Así, progresan ben co seu adestrador, José Antonio Rodríguez, que comezou en febreiro co seu liderado, tendo como obxectivo xogar o playoff de ascenso a 2ª RFEF.

Pola súa parte, o equipo Sénior B tamén se atopa nunha situación positiva, xa que xa está xogando o playoff de ascenso de 3ª a 2ª Galicia, coa finalidade de poder conseguir xogar nesta categoría na vindeira tempada.

Con respecto ao Xuvenil, tamén está competindo por ascender a Preferente Futgal despois de quedar entre os catro primeiros, un éxito que foi traballado durante toda a tempada.

Os cadetes da Sarriana, no seu caso, conseguiron ascender a 1ª Interprovincial, polo que están contentos cos esforzos feitos durante este ano, demostrando que son un equipo de rapaces comprometidos co deporte e co fútbol.

Finalmente, cabe destacar o equipo ‘Revelación’, o Prebenxamín A, que vai xogar o Campionato Galego de fútbol 8, polo que desde a Sarriana defenden que están “contentísimos coa situación actual da Sociedade”, destacan.