A XIII Ruta 4x4 da Comarca de Sarria celebrarase do 21 ao 23 de novembro
A Comarca de Sarria acollerá os días 21, 22 e 23 de novembro de 2025 unha nova edición da súa xa tradicional cita co motor: a XIII Ruta 4x4, organizada polos colectivos Os Carro e Catro.
O evento contará cun amplo programa que incluirá ruta turística polos arredores da comarca, zonas especiais e probas de habilidade, nas que os participantes poderán demostrar as súas destrezas ao volante e desfrutar da aventura en plena natureza.
A cita está aberta a diferentes vehículos, desde motos e quads ata todoterreos e buggys, o que garante unha experiencia variada e atractiva tanto para os condutores como para o público asistente.
A Ruta 4x4 consolidouse ao longo dos anos como unha das actividades máis destacadas do calendario de lecer e deporte de motor en Sarria e a súa contorna, atraendo participantes de toda Galicia e doutros puntos de España.