A XVII edición da Festa do Cocido do Porco Celta de Sarria celébrase este sábado
Este sábado, 15 de febreiro, o Campo da Feira de Sarria converterase no epicentro da gastronomía galega coa celebración da XVII edición da Festa do Cocido do Porco Celta. Este evento gastronómico, xa consolidado no calendario local, reunirá aos asistentes nun ambiente de tradición e sabor.
Cada mesa contará con trece comensais, que compartirán un suculento menú composto por sopa e un completo cocido de porco celta. O prato incluirá chourizos, lacón, soá e butelo, acompañados de grelos, patacas e garavanzos. Para completar a experiencia, servirase queixo con marmelo e o tradicional café de pucheiro.
A encargada de dar o pregón este ano será a profesora e catedrática da Universidade de Santiago de Compostela, Rosaura Leis. Ademais, a animación do evento correrá a cargo dun grupo da Asociación Cultural sarriá Peleriños, que porá a nota festiva á xornada.
Para os interesados en asistir, pódese reservar mesa chamando ao 982 535 000. Ademais da celebración no Campo da Feira, tamén se pode gozar do cocido nos establecementos colaboradores. Ata o momento, confirmaron a súa participación os restaurantes Cinza e Lume (609 126 992) e Roma (982 532 211).
Para aqueles que prefiran degustar tapas, a opción estará dispoñible na cervexería Don Pepe (Rúa da Liberdade 126) e na taberna D'Orixe (Rúa da Liberdade 165).
O Concello de Sarria aproveita a ocasión para convidar a todos os establecementos que desexen sumarse a esta festa gastronómica. A XVII Festa do Cocido do Porco Celta promete ser unha cita imprescindible para os amantes da boa mesa e da tradición galega.