A XXXIV edición da Mostra Agrogandeira San Isidro desenvolverase esta fin de semana en Sarria
Sarria acolle unha nova edición da tradicional Feira de San Isidro esta fin de semana, días 10 e 11 de maio, cun amplo programa de actividades centradas no mundo gandeiro, a cultura, a música e a gastronomía.
O sábado 10 de maio, a xornada comezará ás 10:00 horas coa inauguración e apertura do recinto feiral, onde haberá exposición de maquinaria, mostra de bonsáis da Asociación El Serbal, produtos artesáns e moito máis.
Ás 12:00 celebrarase a poxa de xovencas frisoas. Media hora despois, ás 12:30 horas, terá lugar a actuación do grupo Meigas e Trasgos e, á mesma hora, a V Feira Cabalar da Asociación Pura Raza Cabalo Galego.
Ás 13:00 horas haberá unha escola infantil con actividades como coidado, trenzado e engrasado de cabalos.
Xa pola tarde, dende as 16:00 horas, celebraranse os concursos morfolóxicos de cabalos e egüas de pura raza galega e cruzados, que se desenvolverán ata as 18:30 horas. Ás 17:00 tamén se poderá gozar de pases de doma de alta escola. A entrega de premios será ás 19:00 horas.
A partir das 20:00 horas, comezará a tradicional pancetada-chourizada de San Isidro, que estará amenizada coa actuación musical do grupo Ouro Tropical. Ás 20:15 horas está prevista a chegada da ruta das fachas da concentración de motos Vila de Sarria.
O domingo 11 de maio, a feira continuará coa apertura da feira de gando ás 10:00 horas. Ás 12:00 terá lugar a poxa de xovencas de raza rubia galega (ACRUGA). A música encherá as rúas de Sarria ás 13:15 horas co pasarrúas da Banda da Comarca de Sarria.
Xa pola tarde, ás 16:00 horas, haberá unha actuación de Peleriños, seguida dun festival infantil cuxos detalles están por confirmar. Finalmente, ás 18:00 horas, sortearase unha xovenca de raza rubia galega entre os asistentes no recinto dos concursos gandeiros.