Abraham Cupeiro presentará 'Loira' no Auditorio Fuxan os Ventos de Lugo en maio
O músico sarriao Abraham Cupeiro ofrecerá un concerto o vindeiro 16 de maio no Auditorio Fuxan os Ventos de Lugo, a partir das 21.00 horas.
Durante este recital, Cupeiro presentará o seu novo álbum Loira, unha proposta que se caracteriza pola súa mestura de contrastes e emocións, combinando pezas eufóricas con outras máis íntimas e reflexivas.
Loira, tal e como explica o propio autor, é un disco cargado de significados persoais e experiencias que se remontan á súa etapa de confinamento. "Mentres escribo estas liñas, ela, Loira, está ao meu carón, como cando facía vídeos na corentena no sofá da miña casa. Quizais teña que ver que estea cega para que lle guste tanto a música. Ela é mestiza, coma este disco, que recolle temas dispares, cancións que gardaba nun caixón dende hai anos e que agora quero compartir con vós", comparte Cupeiro sobre a súa inspiración no proceso de creación.
O concerto promete ser unha noite chea de emocións, onde o público poderá gozar dunha fusión de sons e estilos que reflicten a diversidade e a personalidade de Loira.
Será unha oportunidade única para descubrir este novo traballo de Abraham Cupeiro, que se está a consolidar como unha das voces máis singulares da música galega contemporánea.