Adif avanza no plan de renovación integral da liña Ourense-Monforte de Lemos-Lugo con actuacións en Sarria e Lugo
![Obras-Adif-Lugo](https://sarriaxa.com/wp-content/uploads/2024/05/Obras-Adif-Lugo.jpg)
Adif avanza no plan de renovación integral da liña Ourense-Monforte de Lemos-Lugo (117 km); un investimento de 550 millóns de euros que reforzará a súa fiabilidade e capacidade e contempla actuacións sobre a infraestrutura, vía, sistemas de sinalización, telecomunicacións e estacións, así como a adaptación da electrificación do tramo Ourense-Monforte e a electrificación do tramo Monforte-Lugo.
No ámbito das estacións, realízanse operacións que amplían e melloran as prestacións da infraestrutura:
En Lugo, renóvanse e adecúan vía, desvíos e instalacións á solución intermodal deseñada para a súa estación. Cun investimento de 22,3 millóns de euros, a actuación incluirá un novo edificio de viaxeiros, un paso inferior entre plataformas de uso exclusivo para viaxeiros, outro paso inferior urbano peonil e a urbanización da contorna, quedando integrada nunha praza intermodal que conectará as terminais de ferrocarril e autobús.
En Sarria, avánzase na instalación da nova pasarela peonil sobre vías. A estrutura comunicará as plataformas da estación e reforzará a permeabilidade entre o núcleo urbano e o barrio de Ou Mazadoiro, contribuíndo á integración da estación na súa contorna. Ademais, verá reconfiguradas e ampliadas as súas instalacións para o estacionamento e xestión de trens de ata 750 m, co fin de reforzar a súa interoperabilidade e competitividade.
Neste contexto, a partir do 3 de xuño darase de baixa a plataforma central desta estación para a súa demolición e xa se constrúe unha nova plataforma lateral no lado oposto ao edificio de viaxeiros.
Para o desenvolvemento destas actuacións, durante as fins de semana do 18 e 31 de maio efectuaranse nas estacións de Lugo e Sarria traballos incompatibles co tráfico ferroviario, que se suspenderá desde as 23.00 horas do venres ata as 07.00 horas do luns.