Adif suprime catro pasos a nivel en Sarria cun investimento de máis de 819.000 euros
Adif vén de adxudicar por un importe de 819.717,67 euros, IVE incluído, as obras de supresión de catro pasos a nivel na liña convencional Monforte de Lemos-Lugo-A Coruña, no termo municipal de Sarria.
A actuación enmárcase na modernización do corredor Ourense-Monforte-Lugo e permitirá mellorar a seguridade viaria e ferroviaria, así como a mobilidade peonil.
Os pasos a nivel situados entre os puntos quilométricos 389/262 e 392/136 serán clausurados, procedéndose ao desmantelamento dos seus elementos e á colocación de barreiras de contención en ambas as marxes para impedir o acceso á vía.
Como alternativa, executarase un paso inferior en formigón armado in situ nas inmediacións do actual paso do PK 390/344, que quedará suprimido, ademais de novos camiños de enlace cos pasos existentes na contorna.
Esta intervención súmase ás actuacións xa en marcha para eliminar outros 19 pasos a nivel no trazado Ourense-Monforte-Lugo: dous en Ourense, dous en Monforte, nove en Sarria e seis en Lugo capital.