Alumnado do obradoiro de emprego Ancares VII comezará a actuar en Triacastela en decembro
O Concello de Triacastela levará a cabo traballos de poda en vías públicas e acondicionará zonas verdes a través dos traballadores dun novo taller de emprego a partir de mediados do mes de decembro.
Neste caso, o obradoiro de emprego Ancares VII é compartido con Cervantes, Navia de Suarna e Pedrafita do Cebreiro que, financiado pola Consellería de Emprego, Comercio e Emigración, servirá para levar a cabo melloras nos diferentes municipios.
Ademais, entre o Concello de Pedrafita do Cebreiro e o de Triacastela haberá unha especialidade forestal na que se formarán dez alumnos e alumnas, cinco de cada municipio.
En Triacastela, este alumnado terá o labor de limpar as ramas das árbores que se atopan nas vías municipais e tamén se ocuparán de acondicionar algunhas das zonas verdes do Concello.
Desta maneira, os traballos terán unha duración de nove meses, tempo no que 20 alumnos e alumnas recibirán formación teórica e práctica, igual que o alumnado do taller de emprego que aínda está en funcionamento a día de hoxe, aínda que no seu caso a especialidade é de operacións auxiliares de albanelaría de fábricas e cubertas.
Este obradoiro de emprego rematará no mes de novembro e así dará paso ao seguinte obradoiro. No caso deste obradoiro a piques de rematar, serviu para mellorar a vía de Viela de García, co fin de recuperar os muros de pedra e a pavimentación da estrada, xa que une a rúa Peregrino co Camiño de Suavila.