Arredor de trinta persoas realizaron unha ruta de 35 km en bici entre Sarria e Láncara
![ruta-IES-Xograr-Afonso-Gómez-Láncara](https://sarriaxa.com/wp-content/uploads/2024/06/ruta-IES-Xograr-Afonso-Gomez-Lancara.jpg)
Distintos membros da comunidade educativa do IES Xograr Afonso Gómez de Sarria, grazas á colaboración do Club DHGTeam, desfrutaron da súa afición pola bicicleta e do contacto coa natureza.
Arredor de trinta persoas entre alumnado, profesorado, familiares e colaboradores compartiron unha xornada na que practicaron unha ruta de 35 km en bici por sendeiros e antigas vías de tren entre Sarria e A Pobra de San Xiao, onde se realizaron un xantar na praia fluvial.
Contaron coa colaboración da Policia Local de Sarria ao longo da saída polo casco urbán da vila e do Concello de Láncara para utilizar as instalación da praia fluvial de A Pobra de San Xiao.
Esta xuntanza interxeneracional, xa que os participantes tiñan entre 9 e 70 anos, tivo tanto éxito que esperan repetir ao longo do próximo curso escolar.
O centro educativo resalta o agradecemento ao club DHGTeam pola súa amabilidade e traballo, sinalando que non foi a primeira colaboración e tampouco será a última.
O Xograr leva catro anos incentivando as rutas escolares activas e un plan de mobilidade sostible, segura e saudable tendo na promoción do uso da bici un dos seus obxectivos fundamentais.