A música e a tradición serán as protagonistas na programación cultural do San Xoán de Sarria 2025
As esperadas Festas de San Xoán de Sarria celebraranse do 20 ao 24 de xuño con diferentes propostas para toda a veciñanza e persoas interesadas de desfrutar das festas patronais da vila sarriá. Ademais, por terceiro ano consecutivo, todos os días haberá dúas horas sen ruído, entre as 18.30 e as 20.30 horas, na zona de atraccións para facilitar que os nenos, nenas e maiores con hipersensibilidade acústica poidan desfrutar das festas.
Así, as celebracións darán comezo o venres 20 de xuño cun acto inaugural na Casa do Concello ás 20:00 horas no que o empresario sarriao Jesús Pato Mourelos se encargará de dar o pregón. No acto, estará acompañado por intérpretes de lingua de signos para garantir a accesibilidade do evento.
Despois, o lanzamento do foguete sinalará o inicio oficial das celebracións, que continuarán na praza da Constitución coa actuación da Coral Polifónica do Concello de Sarria, a Banda de Música de Sarria, Os Clarisaxos, a Asociación Cultural Meigas e Trasgos e a Asociación Cultural Peleriños.
Xa ás 22:00 comezará a verbena no Campo de Rugby coas orquestras Miramar e Panorama City, mentres que no pavillón José Mario González darase inicio ao XXXV Torneo de Fútbol Sala San Xoán, que se prolongará os días 21 e 22.
Pola súa parte, o sábado 21 a xornada iniciará a actividade ás 18:00 na praza da Vila cun festival infantil, no que terá lugar a actuación de Trémola Teatro, pero tamén haberá globoflexia, música, bailes, taller de tinta máxica e de marcapáxinas. Logo, ás 19:30, o mago Roberto Lolo encherá as rúas de maxia coa súa ‘Hora máxica’, mentres que os Gaiteiros de Goián e a Louband serán parte dos pasarrúas da tarde. No campo de rugby tamén se celebrará o Vibraxoán. E, con respecto ás actuacións da noite, comezarán ás 21.00 horas coa Louband, ás 22.00 horas con Sound Sisters, ás 23.30 horas chegará o grupo de indie Sidonie e, para rematar a noite, a Duendeneta DJ Set estará desde as 01.00 horas enchendo de música a vila de Sarria.
Xa o domingo 22 a festa continuará coa sesión vermú a cargo de Duendeneta no cruzamento da rúa da Liberdade con José Sánchez Aria, acompañada dos pasacalles de Pampónigas, Peleriños e a Banda Comarcal. O peche da xornada correrá a cargo das orquestras Los Players e New York ás 21:30 no Campo de Rugby.
Con máis programación, o luns 23 pola tarde encherán as rúas a Charanga Paradela e a Asociación Cultural Meigas e Trasgos para dar pé á noite máis especial do ano, que comezará ás 21:30 cunha pancetada popular no Campo da Feira con chourizos e liscos. E, como cada ano, o grupo Eoas ofrecerá un concerto ás 23.00 horas, unha hora na que tamén se celebrará a tradicional 53ª queimada popular. Xa a media noite prenderase a Fogueira de San Xoán no Campo da Feira, acompañada do espectáculo Correfoc-Dimonis de la Plana. A noite rematará coa verbena da orquestra Finisterre no Campo de Rugby a partir das 00:30 horas.
Con respecto ao martes 24, pola mañá a Banda de Música de Sarria protagonizará un pasarrúas seguido da recepción oficial de autoridades na Casa do Concello ás 11:30. O repenique de campás na Igrexa de Santa Mariña terá lugar ás 11.55 horas e ás 12:00 celebrarase a Misa Maior cantada pola Coral Polifónica do Concello de Sarria, seguida da procesión acompañada pola Banda Municipal de Sarria, sguindo o itinerario de sempre. Xa pola tarde, a Louband e Batukda protagonizarán os pasarrúas, e pola noite a orquestra Capitol dará comezo á última verbena do San Xoán a partir das 21:30 horas no Campo de Rugy. Á media noite haberá unha espectacular sesión de fogos artificiais, que dará paso á continuación da verbena coas orquestras Capitol e Olympus.
Para poñer fin ás festas, o día 25 celebrarase o Día dos Nenos, no que as atraccións contarán con descontos especiais para os máis pequenos.