Avanzan as obras para ampliar a ruta á capela de San Mamede, en Triacastela
![triacastela ruta san mamede obras sendeirismo](https://sarriaxa.com/wp-content/uploads/2021/04/triacastela-ruta-san-mamede-obras-sendeirismo.jpg)
En Triacastela, avanzan os traballos que se están levando a cabo para ampliar a ruta de San Mamede e que contan cun investimento de preto de 13.000 euros. Cando as obras estean rematadas poderase facer un percorrido circular ata a capela.
O roteiro, que ten actualmente uns 2,5 quilómetros de lonxitude, une a capitalidade municipal coa capela de San Mamede. A ampliación que se está levando a cabo permitirá facer un percorrido circular para ir ata a capela, na que cada 17 de agosto se celebra a festividade deste santo.
A ruta de San Mamede, que se habilitou no ano 2019, discorre pola serra do Oribio e ao longo do seu percorrido atópanse distintas construcións típicas da zona, como antigas alvarizas, que se empregaban para protexer as colmeas do mal tempo e da depredación dos animais.
Os traballos que se están a executar, en zonas de Rede Natura, contan cunha axuda do Fondo Europeo Agrícola de Desenvolvemento Rural.