Carmen José López aposta por "unha nova etapa afastada do clima de crispación" en Sarria
Carmen José López, candidata á Alcaldía de Sarria polo Partido Popular, defendeu nun acto xunto con Alfonso Rueda, presidente da Xunta de Galicia, que "ofrecemos un proxecto estable para sacar a Sarria da parálise, o estancamento e o clima de crispación”.
O presidente do PPdeG encomendoulle a tarefa a Carmen José López de empezar “unha nova etapa en Sarria como alcaldesa dos que che voten e dos que non, porque todos contribuirán a que esta vila medre ligada ao Camiño de Santiago, á hostalería, ao turismo ou á industria”.
A candidata asegurou que hai “moitísima xente traballando” na candidatura dos populares para que a partir do 28 de maio “se volva falar de construír, de medrar e do futuro próspero que merece Sarria” despois dos últimos anos convulsos da política local que protagonizaron o resto de forzas políticas".
López representa un proxecto formado por un equipo decidido a “sacar o municipio da parálise e o estancamento” para apostar por unha nova etapa “afastada do clima de crispación” que caracterizou o Concello durante o presente mandato.
Así, o PP de Sarria presenta 35 propostas para a reactivación, "medidas dirixidas a protexer o futuro económico coa implantación de empresas, apostar polos servizos sociais, atraer turismo, coidar o rural, mellorar a calidade urbana e apostar pola transparencia, a eficiencia e a viabilidade económica", explican desde a agrupación.