Celebran o cabodano de Santiago Rodríguez López coa colocación dunha placa
A igrexa de Paradela acolleu esta fin de semana o cabodano de Santiago Rodríguez López, Fillo adoptivo do Concello.
Con este motivo colocouse unha placa na súa memoria no Panteón de Paradelenses Ilustres, no que repousan os seus restos xunto aos de seu pai, o escritor Manuel Rodríguez López, Fillo predilecto de Paradela.
O acto de colocación da placa contou coa participación de amigos e veciños.
Santiago Rodríguez López (Barcelona, 1971 - Bristol, 2024) foi un destacado xenetista e catedrático na Universidade de Bristol, recoñecido tanto pola súa brillante carreira científica como polo seu compromiso coa cultura galega.
Fillo do escritor Manuel Oreste Rodríguez López, de Paradela, e de Irene López Gómez, do Páramo, Santiago naceu en Barcelona e alí viviu ata os 14 anos, cando a súa familia regresou a Galicia. Posteriormente trasladouse ao Reino Unido, onde acadou un gran prestixio no ámbito da xenética.
Licenciado en Bioloxía pola Universidade de Santiago de Compostela (USC) con Premio Extraordinario, obtivo o doutoramento en Xenética coa cualificación de Sobresaliente cum laude. Tras unha etapa como bolseiro posdoutoral na USC, conseguiu unha bolsa Marie Curie da Comunidade Europea para investigar na Universidade de Southampton. Dende 2006 foi profesor titular de Xenética de Poboacións e Xenética Molecular na Facultade de Medicina da Universidade de Bristol, onde dirixiu un grupo de investigación especializado na influencia de factores xenéticos en enfermidades multifactoriais humanas.
A pesar do seu éxito internacional, Santiago Rodríguez mantivo sempre unha profunda conexión coa súa terra natal. Foi unha figura clave no Certame Literario Manuel Oreste Rodríguez López, dedicado á memoria do seu pai. A súa paixón pola cultura galega levouno tamén a colaborar na creación de diversas obras literarias e a participar activamente en homenaxes a figuras culturais galegas.