Cortiñas, da Casa de Aira Padrón: “A xente que vén tamén desfruta desta contorna”
Falamos con José Luís Fernández Cortiñas, propietario da Casa de Aira Padrón, situada en Samos.
Que comidas ofrecen?
Ofrecemos menú e carta, antes máis menú e agora máis carta. Na carta os comensais poden atopar pescados e carnes. En canto aos pescados, temos troitas, calamares, bacallau, dourada, robaliza...
E de carne, que é o noso forte, ofrecemos carne de Tenreira Galega Suprema, cordeiro, porco, cabrito... A nosa especialidade é o cordeiro ou o cabrito asado en forno de leña. Ademais, temos grella de churrasco, chuletóns...
Despois, temos unha horta e un invernadoiro ecolóxico, polo que son moi famosas as nosas ensaladas con leituga e tomate da casa, así como as nosas patacas. Por último, tamén ofrecemos xamón, chourizo e demais embutido caseiro.
En canto ás sobremesas, facemos todo de forma caseira e os máis demandados son a tarta de castaña e a de queixo, xa sexa ao forno ou fría. Ademais, tamén facemos tarta da avoa e flan de ovo.
Que tipo de servizos ofrecen ás persoas interesadas en ir?
Nós non ofrecemos a posibilidade de encargar comida para recoller e levar á casa, pero si facemos reservas para persoas ou grupos.
Temos un comedor dentro, dúas terrazas que abrimos no verán e un local privado no que caben unhas 25 persoas e que ten de especial que é como eran antes os comedores, coa cociña do medio dos comensais. Aí, sobre todo, organizamos comidas de caza nas que se cociña no medio o que os cazadores colleron.
Pero tamén é moi típico no inverno, na época dos cocidos, que nos reserven grupos e coman neste local privado ao redor da cociña.
Tamén organizamos vodas e bautizos de ata 80 persoas, normalmente temos uns 8 ou 9 bautizos ao ano. Así, en verán podemos chegar ás 100 persoas os fins de semana.
Como é a contorna onde está localizado?
A contorna é bonita, estamos a 1.100 metros de altura, polo que se ve Lugo, Sarria, Monforte, o val da Lóuzara, O Courel, a Devesa da Rogueira, o bosque máis importante de Galicia en canto á flora con variedade de plantas e arbustos.
A xente que vén tamén desfruta desta contorna, na que está preto o río Lóuzara no que, ademais, nesta etapa comeza a tempada de pesca, polo que se achega máis xente.
Cabe destacar que no outono a caída da folla fai que se converta nun lugar tranquilo e fermoso do que desfrutar, xa que tamén vén acompañado da tempada das castañas, que a nós gústanos porque facemos tarta.
Tamén en inverno é moi bonito cando cae a neve, e no verán tamén, todas as etapas estivais neste lugar teñen o seu encanto, tanto arriba de todo como despois baixando cara ao nivel do mar, onde se pode atopar moitísima vexetación frondosa de carballos e outras árbores típicas galegas.
Cales son os horarios e días que se traballa?
Pechamos os martes e só damos cenas os venres e sábados. No verán damos máis, desde o mércores, pero agora no inverno hai pouca xente pola noite.
Cantas persoas traballan en Aira Padrón?
Depende da tempada. Unha media de cinco, pero os fins de semana temos extras, entre 2 e 3, e cando hai eventos collemos máis persoas.
Que beneficios aporta para as persoas que se achegan esta localización?
Creo que van comer unha comida de boa calidade, ecolóxica e caseira e van atopar un bo trato, unha atención personalizada e un prezo acorde coa calidade do produto.
O churrasco só é de Tenreira Galega Suprema, polo que custa máis que un churrasco que veña de Salamanca, por exemplo.
Teñen algún proxecto de cara ao futuro?
De momento estamos contentos e queremos manter a asistencia da xente que vén e a ver se se pode mellorar para que veña máis. Só facemos publicidade nalgún xornal e realmente o que máis nos funciona é o boca a boca.
Por outra parte, esperamos que o Concello nos faga unha ruta polo Val do Lóuzara, ou algún miradoiro que podía haber por aquí, é o que pretendíamos, pero non é cousa nosa.
Pode contarnos algunha anécdota?
Á Casa Aira Padrón viñeron varias personalidades importantes da nosa sociedade, como no seu día Fraga, que comeu tortilla e xamón, e Cacharro Pardo. Pero tamén recentemente veu Feijóo, Yolanda Díaz, Besteiro e Raquel Arias.
Todos eles déronnos mostras de que quedaron contentos coa calidade da comida e co trato que recibiron, xa que é un sitio tranquilo no que se pode comer de maneira privada e con produtos variados de calidade.
Tamén tedes servizo dormitorio, como funciona?
Traballamos menos o servizo de aloxamento que o de restaurante, xa que só temos tres habitacións e ás veces quédanse empregados. Teñen cama de matrimonio e están habilitadas con todos os servizos de baño propio, televisión, wifi... Pero non adoitamos ter moitas persoas no inverno, si que en verán aumenta e temos algunha parella que se queda algún día.
