Efrén Castro realizará o percorrido da etapa sarriá do Gran Camiño
![presentacion o gran camino sarria2](https://sarriaxa.com/wp-content/uploads/2021/12/presentacion-o-gran-camino-sarria2.jpg)
O deputado de Deportes, Efrén Castro, participará hoxe nunha ruta polo percorrido da etapa sarriá da volta profesional a Galicia “O Gran Camiño”, patrocinada pola Vicepresidencia da Deputación de Lugo.
Ciclistas afeccionados de clubs de Sarria e Lugo, acompañados polo ex ciclista profesional Ezequiel Mosquera, farán o mesmo percorrido que o pelotón internacional completará o vindeiro 27 de febreiro, na cuarta e última etapa do Gran Camiño.
Trátase de 15,8 quilómetros con saída do casco urbano de Sarria, tramos polas estradas LU-P-5707 e LU-P-5602,, coincidindo co trazado do Camiño de Santiago, e volta á vila para alcanzar a meta, situada na Rúa do Castelo, fronte as icónicas letras de Sarria.
A tres semanas do evento, que pretende recuperar un espazo propio para o ciclismo profesional galego no calendario internacional, a área de Deportes promove esta ruta que pretende promover o evento no mundo do ciclismo afeccionado e de base, ao tempo que se proxecta Sarria como destino turístico e deportivo e punto de referencia do Camiño de Santiago.
O punto de encontro e saída da ruta será ás 11.00 horas no Campo do Río.