Elena López, subcampioa de España na súa primeira tempada no Nacional de XC
A deportista de Samos Elena López foi proclamada subcampioa no Campionato de España de Cross Country (XC) despois de ser a súa primeira tempada competindo no Nacional, con catro carreiras en Huelva, Cuenca, Badaxoz e Toledo.
Elena, que tamén acadara previamente o título de Campioa Galega de Cross Country, afirmou que este logro é un "soño cumprido" e unha mostra de que está a dar pasos firmes cara adiante na súa carreira. "Isto mótivame para seguir traballando e mellorando", expresou.
Ademais, non quixo deixar pasar a oportunidade para agradecer o apoio recibido ao longo da tempada: "Grazas aos meus patrocinadores pola confianza e apoio, ao meu equipo, á miña familia e a toda a xente que me rodea", dixo con emoción.
"Hai tres anos cando fixen a miña primeira carreira non imaxinaba seguir competindo, nin chegar a facer un podio no Campionato de España así que estou súoer contenta", engadiu.
Agora, di, toca "seguir adestrando e traballando porque aínda queda moito por aprender. Isto serviume para saber no que son mellor, no que son peor e no que teño que traballar para poder gañar un Campionato, que espero poder gañalo pronto, aínda que nunca se sabe, porque hai moitos factores que inflúen neste deporte, como as lesións, a moto... Gustaríame gañar o Campionato, pero non hai que confiarse", sostén, cos pés na terra.
Con todo, a tempada non remata con este éxito, continúa a Liga de Enduro e o Campionato Galego de Cross Country, nos que tamén participará para seguir demostrando a súa forza física e psicolóxica, xa que "tes que ser forte nas dúas para poder soportar os obstáculos das carreiras".