Goián estrea unha zona de merendeiro para as festas do Santo Cristo
Con motivo da Romaría do Santo Cristo de Goián, que se celebra cada ano na primeira fin de semana de setembro, a Asociación de Veciños Ajuilaouca e o Monte Veciñal en Man Común puxeron en marcha unha iniciativa para revitalizar a tradición das merendas colectivas.
Para iso, acondicionaron a carballeira situada no campo da festa, onde construíron un merendeiro que permitirá dar acollida ás numerosas xuntanzas gastronómicas propias destas datas.
As merendas son, xunto coas peregrinacións, unha das partes máis destacadas da romaría, aínda que nos últimos anos —especialmente tras a pandemia— foran perdendo forza.
Co obxectivo de recuperar este costume, o domingo día 7 tamén haberá servizo de pulpería, a cargo da Pulpería Susana e Javier do Corgo. Ademais, a comisión de festas repartirá rifas entre as merendas celebradas no campo e entre quen se quede a comer na pulpería, participando así no sorteo dun xamón que terá lugar o domingo pola noite durante a verbena.
Outra das tradicións que se quere recuperar é a das ‘rosquilleiras’, que nos últimos tempos quedara esquecida. Este ano, os asistentes poderán gozar de novo deste doce grazas a Luis Otero Sánchez, coñecido como “O Rosquilleiro”, que se desprazará desde Cesuras (A Coruña) para poñer o sabor máis doce á festa.