Habló Pablo regresa a Sarria tras 16 anos co espectáculo “Vuelvo a casa”
O músico sarriao Habló Pablo volverá subir a un escenario na súa vila natal despois de 16 anos sen actuar nela. O agardado reencontro terá lugar o sábado 28 de febreiro ás 22:30 horas en Buril ACDE, espazo que acollerá un concerto moi especial baixo o título “Vuelvo a casa”. A cita preséntase como unha noite cargada de simbolismo, na que o artista reconectará coas súas raíces e co público que o viu medrar.
O espectáculo estará aberto a todos os públicos e desenvolverase en formato de taquilla inversa, unha modalidade que permitirá que cada asistente achegue a cantidade que considere oportuna ao remate da actuación. Esta fórmula busca reforzar a proximidade entre o músico e a audiencia, convertendo a velada nunha experiencia máis íntima e participativa, afastada dos formatos convencionais.
A organización do evento é froito da colaboración entre o equipo de produción de Buril ACDE e o propio equipo do artista, que traballaron de maneira coordinada para coidar cada detalle da montaxe. Dende a posta en escena ata o son e o acompañamento musical, todo foi deseñado para garantir un espectáculo de alto nivel técnico e artístico.
Cunha traxectoria que o levou a actuar máis alá do ámbito local e cun destacado labor recente en Galicia, Habló Pablo convértese así nun dos protagonistas da programación cultural da tempada en Sarria, ofrecendo unha proposta que combina emoción, excelencia interpretativa e un forte vencello coa súa terra.