Héctor Corujo, alcalde do Incio, di que na vindeira lexislatura avanzará no asentamento da poboación
Héctor Corujo, alcaldable polo Partido Popular á Alcaldía do Incio reuniuse co vicepresidente da Xunta de Galicia, Francisco Conde, para repasar as iniciativas realizadas durante o último mandato e poñer en valor o traballo do equipo de goberno e do seu proxecto político.
Agradeceu a Conde a súa visita e puxo de manifesto que un dos grandes obxectivos para os próximos catro anos é consolidar ao concello como referencia nas políticas de desenvolvemento rural.
Neste sentido, Corujo resaltou que o seu equipo se fixo cargo do gasto que producían dous servizos: o abastecemento de auga e o alumeado público. Con respecto a este último, indicou que grazas a substitución das vellas luminarias por leds a factura polo alumeado público é a día de hoxe un 40% do que era entón. En canto ao abastecemento de auga, di que coas medidas programadas confía en reducir o custo ao 50%.
Noutra orde de cousas, destacou tamén a aprobación do Plan Xeral de Ordenación Municipal (PXOM) despois de máis dunha década de trámites que terá unha incidencia positiva no concello. Este plan reduce en dous tercios o solo de núcleo rural, crea unha segunda área industrial e contempla un céntrico espazo para equipamento e zona verde.
Ademais, outro dos obxectivos de Corujo foi o achegamento de máis servizos aos veciños e veciñas de O Incio e, no próximo mandato, explica, manterá esta liña de traballo e avanzará no asentamento da poboación, a mellora dos saneamentos, as traídas de auga e a rede de estradas municipais.
Pola súa banda, Francisco Conde confiou en que Héctor Corujo vai revalidar a confianza dos veciños e veciñas do Incio para seguir dando resposta ás necesidades do municipio. Tal e como explicou, "O Incio precisa seguir nesta senda para contar cun rural vivo, con alternativas industriais, investimentos e novas empresas, así como para captar oportunidades para o emprego e o emprendemento".