Iván Carril deixa de ser o adestrado do Sénior A da SD Sarriana
A SD Sarriana e o adestrador Iván Carril puxeron fin á súa relación profesional, poñendo así punto e final a unha etapa que comezou no pasado mes de xullo, cando o técnico asumiu o liderado do primeiro equipo tras o histórico ascenso á Segunda Federación. Xunto a el tamén abandonan a entidade Borja Collar, Adrián Baamonde e Javier Pampín, integrantes do seu corpo técnico.
O club sarriao comunicou que a decisión implica o inicio dunha nova etapa deportiva, agradecendo a Carril e ao seu equipo “todo o seu traballo neste arranque dun curso histórico para a nosa vila” e desexándolles “todo o mellor no seu futuro profesional”.
A entidade traballa agora na procura dun novo responsable para dirixir ao conxunto na súa esixente tempada de debut na categoría, na que o obxectivo pasa por consolidar a permanencia. O equipo afrontará o seu próximo compromiso ligueiro este domingo 9 de novembro ás 17.00 horas, cando recibirá ao Marino de Luanco.